والله إن اللي يداوي عن القلب الجروح
خوة الطّيب وللطيب تقدير وقار
الردي منبوذ يفرق عن الوجه السموح
مثل ما يفرق عن الليل بالضو النهار
الردي يا كثر شره وفي خيره شحوح
لو يشوف الخير بالناس عقله منه طار
قاصرٍ بالناس خيره وفي نفسه شفوح
يا عسى راس الردي ما يزل من العيار
والله إني عارف الجد فرق من المزوح
واعرف أهل الطيب واللي يعكسون المسار
وادري إن الطيب براق وسمي يلوح
صادق نوة ونبّات ريفي الديار
والفخر في عرفة الطيبين أهل الوضوح
الضماير صافية ما بهاميل وهيار
الوفا والجود ميزة بعيدين الشبوح
والصطاوه ميزة أهل الشجاعة والحرار
ما يهين النفس رجلٍ علا فوق الصروح
الرجال ألهم مكانه بمعنى الاعتبار
الرجل يقدح من الراس عن سره يبوح
عكسه اللي تحت ظل الغطا خلف الستار
بالأمانة ما يحفظ الأمان إلا النصوح
ولا يصيب الراي من لا بالأريا يستشار
والرجل لا ضاف باله من اقرابه يزوح
ويترجا خيرة الله من ديره لدار
الجمل ما يرتوي من تحت نطفٍ نضوح
والقواعد ما ترسا على جرفٍ هيار
والصويب اللي صوابه من الفرقا ينوح
مبتلش بمصيبة ما بغا النوح اختيار
الخلايق كلبوها على سير السروح
والبقا لله والمنتظر دار القرار
والصلاة اختامها والقا مسكٍ يفوح
عدّ نجمٍ بالسما والحصا وسط الجمار
"مدارات شعبية"