أسماء من الكوكب ومن هالة النور
وألطف من الورده. ومن نزف ماها
جتنا مع الأحلام من جنة الحور
دلالها الطاغي. يمازج حياها
رغم الحلا من فوقها الملح منثور
حتى تساوى ملحها مع حلاها
بأنفاس غيمه كلها إحساس وشعور
تسوقها النسمه وتسري وراها
غنى الوجود وصفق الليل مسرور
وتراقصت كل النجوم بسماها
فيها انجذبت وحيث أنا إنسان مبهور
أوّل هديه مني القلب جاها
مدامها زهره وذا القلب عصفور
وش يمنع الطير الخضر عن شذاها
ويوم انحنى قلبي لها حني باكور
أقول ليت اللي حناني حناها
عرفتها معجب وعودت مجبور
متمكن بين الضماير غلاها
ما تلتفت عيني على كل غندور
عن الهوى كله منعني هواها
عهدٍ عليّ لو عشت لنفخة الصور
إني لأموت وخاطري ما نساها
وأنا عصي الهرج عن كلمة الزور
ما قول حاجة غير في مستواها
"مدارات شعبية"