يامرحبا ترحيب يكتب وينقال
يا مرحبا ترحيب عطر عبيره
ترحيبة تبقى على عبر الأجيال
صوت وصدى في دربها مستنيره
من هاجس حده على بدع الأمثال
نوٍ سكب غيثه على كل ديره
سامي سماء عرض السماء يشعل أشعال
تشوف برقه كل عين بصيره
نوٍ ومره الله للخير همال
ما فيه ضامي مارتوى من غديره
ون قيل منهو قلت للعلم منوال
العاهل اللي فيه نخوه وغيره
مليكنا اللي لصعيبات حلال
ننعم بخير الله ثم بخيره
فيه المبادئ والمكارم ولازال
ريف الأيدين الأغنياء والفقيره
يا من رصيدك بالزمن عز ورجال
صقر العروبه ما يوصف بغيره
الحاكم العادل ويا شيخ الأبطال
عليك شعبك حلقةٍ مستديره
شعبك معك وأمرك على كل الأحوال
يا من بشرع الله حكم ضميره
حنا معك يا سيدي سلم وقتال
بأمرك نشيل أرواحنا والذخيره
بأمرك سلايل عبس حل وترحال
بني رشيد أكرام نحوه وجيره
على الولاء نرسي كما ترسي جبال
وأهل النفاق قلوبهم مستذيره
ربعٍ ولانا ما تحلحل ولا حال
صدق وفاء لولاتنا والشعيره
لأجدادنا بأرض الوطن فعل وأطلال
أبناء الوطن ورجال صقر الجزيره
وختامها يا معرب الجد والخال
الله يديمك للوطن والمسيره
"ملحق حائل"