كم واحدٍ لو هو من الربع الادنين
يضحك وقلبه حالك في سواده
بقبالتك طيب وبقفايتك شين
يعمل على وجهين سهمه وعاده
في مقصده يغويك حتى عن الدين
يبذل جهوده لاتكون بسعاده
يجلس معك ينصحك عن البعيدين
وتفكر انه متنصحٍ لك زياده
ياخذ من اسرارك رموز وعناوين
ويكمّل الباقي (ب) حسب اجتهاده
وينشر خبر عاجل ابليا موازين
ولايهمه كاذبه من وكاده
يحرص على التفريق من بين الاثنين
وليا سمع له علم ينسى الركاده
مار ان مثله بالاوادم قليلين
والله يفعل ما يشا في عباده
ياليت يوجد به علامه على العين
حتى تحقق وحدته وانفراده
حتى ليامنه وقع ماله معين
يذوق من طعم الشقى والقراده
اللي يحرك بالفتن بين الاخوين
مطاوع لابليس وابليس قاده
حول الاقارب مثل فعل الشياطين
دايم عيونه مثل عين الجراده
الله يقطع دابره قولوا آمين
عمره عسى ربي يعجل حصاده
نصبح من اللي صيفته مستريحين
سلامةٍ من مثل ذولى سعاده
"مدارات شعبية"