لقيت بقلبك المرسى وفي عينك حكي وأسرار
على باب التردد تدفعك رغبة وتمنعها
تجيني معك ثورات المشاعر والغلا تيّار
يودي نفسي لدرب الضياع ولا يرجعها
دخيلك ليه تنثرني على وجه الطريق اصرار
أحفظ الحسرة اللي داخلي وأجيك أسمعها
وأنا والله مدري وش حصل فيني بدون إنذار
جذبني يمك ويمك لي أشواقٍ مطوعها
تبث أخبار بعيونك وصوتك ينفي الأخبار
كأنك تعمي عيون الجريمة في دوافعها
أشوفك ما تبيني احترق وتقطني بالنار
وأنا وشلون أفسر فكرةٍ ما احتاج أطوعها
فديت عيونك اللي جات تعزفني حزن مزمار
وفديت كفوفك اللي جات تلعب بي بصابعها
محيط العاطفة جاته عيونك ذبذبة رادار
أمانة كيف أطير بعاطفة قلبي وأسنعها
تعال وبوح لأشواق الخفوق اللي خذاك أشعار
لأجل ما ينقطع قلبي من أشواقك منافعها
تأكد لو كسرت الحاجز بصوتٍ بقلبك دار
وربي كل قطرة دم بعروقي تنازعها
وتلقى داخلي حبك بنا شوقك ثلاث أقمار
وأجيلك سكةٍ قامت تشجعني واشجعها
وإذا شفتك معزم منت ناوي تكمل المشوار
بوادع روحك وروحي عن الدنيا بوادعها
"مدارات شعبية"