ماهي حايل لو أن الاسم حايل
أنا عندي براهين ودلايل
بلادن تنجب رجالٍ نشاما
وتنجب شيوخ فرسان القبايل
وتنجب كل رجال مسمّا
حصانن عانق الحصن الاصايل
هوى وجبال ونفوس عزيزة
بلادن تجمع عيال الحمايل
غريب الدار لاجاها رغبها
يفوت العمر مادور بدايل
تحت ظل السعود إخوان نوره
ماهي حايل لو أن الاسم حايل
وحايل طيبها من طيب اهلها
هل الطولات ماضين الفعايل
عزيزين الجوار اهل الحميا
لهم عادات في كسب النفايل
هل الشيمات والعادات دايم
جوابن يقتنع به كل سايل
اهل قولت هلا من قلب صافي
هلا تجلي عن الكبد الغلايل
هل الترحيب ورجال الشكاله
هل الفزعات وافين الخصايل
بلد طاعة بلد طيبة وهيبه
ماهي حايل لو ان الاسم حايل
وحايل لو تحدث عن كرمها
قضى عنك الحكي ماطلت طايل
كفاية حاتم الطائي ولدها
بحاتم تضرب الناس المثايل
سجايا حاتمية حايلية
شمايل ماتماثلها شمايل
عناوين الشهامة والكرام
مواريث من رجال أوايل
الى شح الزمان وشان وجهه
لاهل قولت هلا شد الرحايل
ماكل اسم يبي يطابق مسمى
ولاهي حايل لو ان الاسم حايل
عروس بالشمال ارض المحبه
لها ودٍ بوسط القلب هايل
عليها سابقتني ذكرياتي
طفوله حالمه وعقال مايل
سلام الله على حيّ الزباره
وعلى ذيك المرابع والمسايل
الى هب الهوى من صوب ربعي
ذكرت اللي يعشقون الجمايل
وذكرت مبرهجن ماصك بابه
بوقته والعرب مامن صمايل
واكيد اللي مسميها ظلمها
ماهي حايل لو ان الاسم حايل
"صيف حائل"