الشاعر الملهم اللي جل من يلهمه
فراج عسى ولي العرش يستر عليه
ما زل والله بما قاله وخط قلمه
جاب الحقيقة وهذا منه شي بديه
متعلمٍ المراجل عاش من علمه
وعزيز نفسٍ شموخه للعلا محتميه
لو مره العلم طاير في ثوان فهمه
بالحال ما قال لا وشهو ولا قال ليه
ما هوب يحتاج للتوضيح والترجمة
يقدا طريقه وعن درب القدا ما يتيه
يا صاح من لا يحشم الناس من يحشمه
الا ضعيف قليل المعرفة يرتجيه
والا رجال الوفا شرواك ما ترحمه
ولا هيب تمشي على دربه ولا تلتقيه
غادي جدا ثقل دمه مثل دم حلمه
ما حد يوافق على رايه ولا يقتديه
ولا حد يسير عليه ولا حد يعزمه
منبوذ ما حد يبي قربه ولا حد يبيه
عن منهج الطيب غادي والوالي محرمه
وعن مسلك أهل الوفا والطيب تبت يديه
نفسه بما سولت له غاديه مجرمه
تجرم بحقه بعد تاهت غدا فيه تيه
أهل الكرم والوفا لوانها معدمه
عن مجلسه تبعد النجعه ولا تلتفيه
تقول جمرة مني كل العرب ترجمه
ووادي محسر محله يحرم النزل فيه
والا مجالس هل المعروف والمكرمه
منصى الرياجيل من مره يميّل عليه
راعيه فيه العرب بالخير متوسمه
راعي هلا بالكرم حمد العرب يشتريه
شرواك لعل من عقبك للمرحمه
يستر عليه الكريم ويحفظه ويهديه
"مدارات شعبية"