أنا أسمع عن حصاة ارزاح ما ادري وش حصاة ارزاح
تراودني بصحتها الشكوك أحيان وأحياني
أقول أسطورة الماضي وخلفها زمان راح
اثرها الصاحب اللي عنده المعروف مجاني
ومن يبلى بها يحتار لا تدفن ولا تنزاح
لو ان اللي يحاولها معه خاتم سليماني
ألا يا من يعين لي صحيبن يبعد المسراح
ليا شاف إني أدري خاطره بالفعل يدراني
يصافيني على عز وكرامة والقلوب صحاح
ما هو قاصر نظر لا غبت عنه اسبوع ينساني
على لا شيء أشوفه لم حجانه وسده باح
وطاوع هرجة اللي ضيعوه فلان وفلاني
صراحة بعدها قلبي نساه ومن عيوني طاح
أبا أعلنها صريحة واطلع المكنون يالساني
على مثلي غريبة كيف أصدق دمعة التمساح
وهذه عادة التمساح لو يضحك بالاسناني
اثر بعض النوايا البيض ذباحة بدون سلاح
حسافة يا حسافة زين ظني بالعريباني
أحسبه عارفه وأثره جاهل والجهل ذباح
يغير صاحبه ويحول الأصحاب عدواني
ليا خيم على عقل البشر قفل بلا مفتاح
ولا له فوق الأرض علاج بين أنسي وشيطاني
يقولون العيال تبين بعد صياح ولا نكاح
وأثر بعض العلوم مقوله من غير برهاني
ليا جات المواقف يطلع النادر من المساح
وناس تبعد النظرة وناس شوفها داني
وناس قربها هم عميق ويطلع الأرواح
وناس قربها مثل العلاج يداوي الأبداني
وأنا أقول الحقيقة والحقيقة للصدور وشاح
وهذه سنة الله والعباد أشكال وألواني
وعرفت اللي يقولون العرب عنها حصاة ارزاح
اثرها رمز يرمز للأوادم بعض الأحياني
"مدارات شعبية"