ألا يا بحر والله إن فرقا الولايف شين |
ولا انته بحريني ولا نيب بحريني |
غريبين دارك وين وأنا دياري وين |
عسى الله يكون بعون كل الغريبيني |
تلاطم مياهك ضايق الصدر يا مسكين |
لعله يروفك من يروف المساكيني |
يمرك خلي البال مالد فيك بعين |
وأنا ساع شفتك عنك ما حولت عيني |
أحس إني أعرفك منول مهوب الحين |
ولو إن ما من معرفه بينك وبيني |
اعرف الوجيه اللي نحتها العنا والبين |
على قول راع السالفه خبزة يديني |
وعرف الدموع اللي على وحده وثنتين |
تعلق بعينك كنها تا تناديني |
اقدر ظروفك ونت دمعك يبل الطين |
وأنا كيف ألومك وأنت دينك على ديني |
وأنا قصتي يا بحر قصة تهز الصين |
لها في وجيه أهل الكرامة عناويني |
لها جرح يبقى في خفوقي ليوم الدين |
اجل عاد وإنها قطعة من شراييني |
تبي تشتكي لي غيبة الأهل والغالين |
أنا مثلك اشكي غيبة أهلي وغالبيني |
تبي تشتكي لي حي اقفى مع المقفين |
أنا ما عرفت ألا وجيه المقفيني |
تبي تشتكي لي طعنه السيف والسكين |
تهايق بصدري وأنت تلقى السكاكيني |
وإذا كان تاتبكي وتنثر دموع العين |
تراني على حد البكا لا تبكيني!!؟ |
دخيلك كفاية لا تجيني بوجه شين |
أنا اللي لقيته من زماني مكفيني؟ |
أقوله ويا درب الشقا متعب الماشين |
على وين يا درب الشقا تا توديني |
وألا يا بحر باكر يجينا بوجه زين |
يبا الله يفرجها علينا قل آميني |
سالم الرويس |
|
