الله من عينٍ طرقها صواديف

عميت ويبسن العروق الصخافي

شفت الوزى بالعين من عرض ما شيف

شفته وغيري ما فطن له وشافي

وقتٍ تغير فيه حتى العواصيف

جا.. في عواصيف الرياح اختلافي

شره قناطير وخيره مقاطيف

يفطن به اللي يرضع الديد غافي

كم واحدٍ جاله زمانه على الكيف

واغتر في نفسه يبا الجود وافي

يطلع مطاليع العلا.. بالسواليف

وبين العذارى عد روقه سنافي

هراج بالغيبه وكرّاه للضيف

قتات والقتات بالنار هافي

يعلق قريبه علقة النار بالليف

عيّن ولد عيّن زنوده ضعافي

ان رخصت الحذوة توقا عن الحيف

وان غليت الحذوه مشى اللاش حافي

يرقد ويلحق والدنيه تخاليف

دايم ومرقد طافي النار وافي

هو ما درى ان الجود يبغى تكاليف

سهر الليالي مقبلات مقافي

يبغى يدينٍ للعطايا مغاريف

ويبقى رجيلٍ ما تمل الوقافي

والصبر مبخور السنين الشواصيف

اللي قساها مثل حدب الرهافي

ما يقدرون الجود سود الاضاليف

امشاركة بيض النساء باللحافي

يقدر عليه اللي حكم نجد بالسيف

مودع مباغيض القبايل ولافي

عبدالعزيز اللي يبث المصاريف

يجدع قناطير الذهب بالفيافي

يمسي على دربه جموعٍ مراديف

مزنٍ تنثر ماه والجو صافي

يشدي لواقيط الزبيدي بعد ريف

من ماكس البيداء تفيد الضعافي

بندر بن سرور

صفحة الجزيرة الرئيسية

الصفحة الرئيسية

رأي الجزيرة