يرقد معالي الدكتور صالح بن عبدالله المالك أمين عام مجلس الشورى في إحدى مستشفيات الرياض، وكلنا أمل ورجاء بالله أن يعافيه ويشفيه ويعيده إلى أهله وبنيه ومحبيه، وهذا دعاء إلى الله وابتهال كتبته بعد زيارتي له حيث يتلقى العلاج وكله إيمان وأمل ورجاء. |
بسم الله اللي ما لغيره ترجيت |
ولا بعد مديت إيدي لغيره |
بسم الله اللي كل ماصبحت وامسيت |
رفعت ايديني أطلبه واستجيره |
يالله طلبتك بالفجر يوم صليت |
إنك تعافي ولد عمي تجيره |
ترفع عنه يا رب يا حامي البيت |
تبقيه لِصْغَيِّر وبنت صغيرة |
خله يربيهم مثل مانت وصّيت |
في محكم اكتابك يريح ضميره |
تو الولد يرضع ولجله تمنّيت |
إنك تحفظ اللي عيونه بصيرة |
يدلهم درب السنن والمواقيت |
والواجبات اللي فروضه كثيرة |
|
يا ولد عمي ما عملته وسويت |
للدين والدنيا وناس فقيرة |
على مدى خمسين عام به أعطيت |
من علمك الوافر علوم غزيرة |
في مجلس الشورى وقبله توليت |
مناصب بالجامعة لك شهيرة |
عملت ما يرضي ضميرك وساويت |
بين الفقير وبين شيخ العشيرة |
أخلصت للدولة ولا يوم غشيت |
والناس تشهد يا نقي السريرة |
|
باكر وبامر الله إلى قلت خفّيت |
كنّ المرض ياخوي هوّن سعيره |
رفعت يَدّيني للسماء ثم ناجيت |
ربّ رحوم مالنا اليوم غيره |
باسم أسرة المالك رجوتك ومديت |
إيدي أبيك اتهوّن اللي عسيره |
تحفظ ولد عمي وتشفيه يا ليت |
وتطول ابعمره ودربه تنيره |
خله لنا يا من إذا دعيت لبيت |
عسى الفرج يارب ياتي بشيره |
|
