الله يقطعك يا الجوال وارسالك |
يومك تجيب الرسالة والغثى ليه |
مكتوب بعد السلام وشلونها حالك |
تعال صفر الدلال اليوم ممليه |
وصلت أنا منزلك ولبيت مرسالك |
دعوة رفيقي ترى ما هي بعاديه |
قال اقلط الدار يافال السعد فالك |
يا حي قرم لفانا ما خلق زيه |
جلست في مجلسه والاجودي سالك |
في عرض الاجواد مدري ويش داعيه |
فلان والله ترى ما يساوي نعالك |
واحذر من فلان طبعه يشبه الحيه |
وفلان لو تعطيه كل الزين ما وفالك |
لو تنفعه رد لك المعروف بالسيه |
قلت أقطع الهرج الله يقطع أشكالك |
نفسك على غيبه الأجواد مبليه |
تغتاب عمك ومرة تحتقر خالك |
سوالفك كلها يا فلان سلبيه |
يا شيخ ماني اخوك ولا أصغر عيالك |
أستاذنك يا ردي النفس والنيه |
مع السلامه ترى مشروب فنجالك |
لا تنتظر من جنابي صوبك الجيه |
طراد السويدي |
|
