على طاري الهزيمة والنصر ومقابل الأبطال |
أشوف أبطال مهزومة وأشوف أبطال منصورة |
وأنا ما نيب متصعب وألا أشجع تشجيع هبال |
معي فكري وأعز النادي إلي ساطعٍ نوره |
ليا منه لعب ما هو يعلق فوزه بآمال |
يجيب الفوز بإذن الله ويرضي كل جمهوره |
تشك إنه مع الفوز متضامن لن فوزه طال |
ما عاد إلا يزيل الشك ويسيطر على الكورة |
لو إنه فارسٍ في معركة ما قابلة خيّال |
وقف وقفة شجاع وقفته بتصير مشهورة |
هذا نادي الهلال وكلنا نعتز بك يا هلال |
خذيت الكأس جعل الله يطول عمر أخو نورة |
جعلنا نعيش في أمن وأمان وزود عز ومال |
ودعم الأنشطة شيٍ يخلّي النفس مسرورة |
ولا أنسى ريّس الهلال أبو فيصل عريب الخال |
محمد في مجال الطيب له فزعات مذكورة |
بذل ماله وجهده وما ذخر من دونهم مثقال |
جَعَل له بصمةٍ في صفحة التاريخ منشورة |
ومن شارك بدعمه للفريق اليوم طال ونال |
كسب ما قدمه لنّه كسب فريق اسطورة |
ولا به منهزم كل الفِرَق في ذا الوطن أبطال |
وهذي عادة الدنيا وهذي حالة الكورة |
شجاع بن سعيدان |
|
