طرقك مختلفة وحالك مقتضاه إله بنود

وأحوال تركيبك ليا انصاغت على المعنى ركب

أحفادك أبطال أربعه وأحيان تصبح لك جدود

عصبة وفاء مترابطة مع بعض بجذور ونسب

تنفّسك وزن وتناهيدك كسر والاّ قيود

في حنجرة صفر اليدين من التعب ياما كسب

عليك لحّو والعرب كثرو مصادير وورود

اللي سلك درب ٍ سهل واللي سلك درب ٍ صعب

ياما تربّى في كنفك ,,ملوك ,, وجيوش ,, وفود

وعصور بأنواع الدول عاشت على مر الحقب

وشيوخ ,, وقروم ,, وعيال ٍ لك موشيت الزنود

صدورها لامن فركت أعماقها تطلع ذهب

كندت بالوافين وانته للوفاء منتب كنود

اليا تخللت بسراة كبارهم بين العرب

وقّف ,,,, مدام ان الأمانه مؤمن بها والعهود

اعذبك في صدقك والاّ من عذوبتك الكذب

نوّخت لطوال الرقاب وشمت عن عدي الأسود

ماهكذا حالك ولا طبعك ولله العجب

أرقت ماء اوجيه ناس ,, تراق من طبع البرود

ظهورهم ياما انحنت ووأحوالهم معها تكب

صدور خلق الله رعى فيها الشعور بلا حدود

العاطفة حيه لكن تموت لا جت في عُلب

لو ضوّرك جوعك وبانت في ملامحك اللهود

تداول الأيام مابين السعادة والكرب

لكني أعيشك سعادة من وجودك لي وجود

وادفاك منّي ,, في ليال البرد ,, واتكسّر حطب

محبة الغالين ماتنقص قدر الاّ تزود

تحضن طفولتها وتكبر ,,, لو تخللها عتب

مثل احتضان السور للطايف من أيام الحشود

والاّ مثل غزوان بالطايف تعزوى واعتصب

سلام يالطايف من علوّك ليا علوّك يجود

وان هزّه الجمهور في ( القاعه ) تساقط له رطب

من أي باب ادخلك واحكي عنك يالشامخ واجود ؟!

تبا تتعب فنون البلاغه والشعر وأهل الأدب

عمّا يقلّه ظاهرك ,, والا عن بطون اللحود

من الصحابه في سبيل الله يبون اعلى الرتب

عباسك ,, وريعك ,, وشبره ,, والحزم ,, تبقى شهود

لطلالك ,, وتاريخك اللي ما انّسى ولا نضب

وعكاظ وأمجاده هنا ,, لن حك عود براس عود

واقف على أمجاده سنين من الوفاء ولا تعب

قلاعك اللي روسها بقيت مثل روس الفهود

دفنت هياكلها ,, وفوق قبورها بقيت نصب

وعيونك اللي شاخصه بين القصور ولسدود

وصوت المؤذن من على ( عداس ) يتعدى نخب

وان شب برقك في سحابك وارزمت فيه الرعود

ينهال صيّب ,, عاش رمانك وعنقود العنب

وضبابك اللي في علوّك له مواعيد ووعود

ما كنّه الاّ عود جاوي في حلال أهل الشبب

وليا تحاور دوشك وريحانك ونخب الورود

حديثها عمن شرح صدرك ,, ومن وجك شرب

حنين يالطايف حنين ,,ولا يساومه الركود

قلبي تقسم لك ,, وفاء ,, وامال ,, واحزان ,, ولهب

الشاعر /سلطان الشهيب

صفحة الجزيرة الرئيسية

الصفحة الرئيسية

رأي الجزيرة