لولا القصيد الزين والابداع والطرح الجديد

ان كان ما جاء للقصايد قيمة يعنى بها

تجدد الاشعار والفكره نواة للقصيد

ومن جاز له فكره على وضحى النقى غنى بها

من يعتلي في قمة الابداع واسلوبه فريد

يرسم لشعره صورة ما احد دخل مع بابها

يبني بيوت الشعر بالحكمه وبالراي السديد

وكل المعاني قبل يبداها يحسب حسابها

يقهوي ضيوف القصايد من قريب ومن بعيد

من دلة فنجالها يجلي عمس شرابها

يشد ذهن المستمع والنور باشعاره يزيد

ويفتح دروب واسعه من طيبها يمشى بها

أهل النضر والعرف ما يرضون بالمد الزهيد

ولا جاملوا ناس من الشهره يزيد عجابها

يرضون بالمعنى وروح الشعر للعاشق يفيد

وكم حكمة يطلع على سطح القمر من جابها

ما جابها الا شاعر عنده من الخبره رصيد

يصخر العسرات والجزله لها طلابها

بعض القصيد يلين منه القلب لو انه حديد

هذي حقيقه واقعه بين العرب يدرى بها

والبعض الاخر كنها فوق الجبل مثل الجليد

تطلع عليه الشمس ويذوب الضحى باسبابها

وش ناتج اللي رميته يمكن تصيد او ما تصيد

ولا خير في رميه تجي ما صوبت مضرابها

ما يشغل أهل القنص غير اللي برمياتها يعيد

يذير الصيد وهو في رميته ما صابها

لكن إلى منه لقى له ناس بافعاله تشيد

يعد نفسه عوضت مجهودها واتعابها

الموهبه نعمه من الخلاق رزاق العبيد

وما كل رجال بدنيانا يبي يحضى بها

وإلى رجعنا في كلام الحق والعلم الوكيد

كل يقول ان الاصايل ينعرف ركابها

أحمد سعود الحمد - الزلفي

صفحة الجزيرة الرئيسية

الصفحة الرئيسية

رأي الجزيرة