يامن حديتيني على ضيقة البال |
ما كفاك عن طرح السؤال الرساله |
يعني ضروري صوت وحساب جوال |
وإرهاق فكر وموجبات انشغاله |
حاضر بحاضر واسمعي روس الأمثال |
جواب يتحمل جوابه سواله |
الحب نفس الحب في كل الأجيال |
لو يختلف مع كل جيلٍ مجاله |
يا كثر ما عذب مشاهير وابطال |
كم عاقلٍ عن واقع العقل شاله |
أكبر من التعبير في كل الأحوال |
واخطر من الأخطار في كل حاله |
كم جادلٍ تحتل بالحب رجال |
ويشاف بعيون الجميع اختلاله |
ما مثلها يرخص له الحال والمال |
أغلى من الغالي من أغلى عياله |
عن حبها ما يحكم الدمع لا سال |
لو طال تعذيبه على طول باله |
هذا القليل وغير ماهوب ينقال |
الحب منه العقل يرجح هباله |
واكبر دليل محدثك شاف الأهوال |
الله لو تدرين عن ما جرى له |
عاش العذاب سنين مع كل موال |
باسباب حبٍ تل قلبه وجاله |
حب الهنوف اللي لها الحب لازال |
حبٍ غصب ماهوب طيب وجماله |
دحيم النومسي |
|
