الصداقة عملة فيها المزور والحقيقي |
والمنافق مع مرور الوقت يظهر لك نفاقه |
قدر الطيب ولا تجفاه لو طال الطريقي |
والردي لا تتبعه منتب على جنبه علاقه |
والرفيق اليا بلاك الله بعيلات الرفيقي |
عامله باسلوب طيب لا توريه الحماقه |
خل في صدرك سعه وان ضاق باله لا تضيقي |
لا تسبب مشكلة بين القرابه والرفاقه |
لا تهاون في شرارة زند وتولع حريقي |
سبة المشكل شرارة زند وعلوم دقاقه |
وربعك الادنين زلتهم تراها ما تعيقي |
لا تسويها قضية بينهم وتصير عاقه |
قابل الجاهل بضحكة سن وحجاج طليقي |
وادمح الزلات لو ان الخطا مر مذاقه |
سايره واصبر على الزلات لين انه يفيقي |
وان تمادى في خطاه أخير من حربه فراقه |
عبدالله مقبل العتيبي |
|
