يقولون القفص ما عاد يوجد به ولا عصفور |
زمان العام غرّد بالفضاء تالي عصافيره |
وأنا غلطان ما لحقت السبور الاوله بسبور |
وكم قبلي هقا هقوه وغرنه مسابيره |
بعفري الظبا ما هو معوضني سنام الثور |
تجاوزت الاخير وقلت يا الله جعلها خيره |
والا يا للي تعذر مانت من شرهاتنا معذور |
وبالذات الثقه لازل ما نقبل معاذيره |
عطيتك علم أبيك تردلي علمٍ ثبات وشور |
وقلت العد جم وديرةٍ ما مثلها ديره |
وسقت الرجل في الدرب السليم الواضح المأثور |
احسب أن البلد ترقص مع النسمه نواويره |
بعد شفت النموذج جيت بشعور وبدون شعور |
أبي عد الروى وجوار ناسٍ تعرف الجيره |
واثرك تسولف وتوصف بلد وانته مطفي النور |
وأنا قلت أنجز الموضوع لا داعي لتأخيره |
واثر ما فوق الأرض يدور مثل الأرض يوم تدور |
أخيراً شفت مضمون الخبر لفه وتدويره |
وقلت اللي يطرّب مسمعه تغريدة العصفور |
عليه يقابل البستان لا غنت عصافيره |
مشعل بن عبدالله القرن |
|
