قريت بالمعجم عن أصحاب الالباب
|
علمٍ يفيد ومتسع في نطاقه
|
الشرح وافي بالمعاني والاسباب
|
وقمت اتصفح كل باب برواقه
|
وبحثت عن معنى الرفاقه والاصحاب
|
وشفت العلوم المحكمات الدقاقه
|
مدلولها يفتح على الواقع أباب
|
ما دام للموضوع ربط وعلاقه
|
تبنى الرفاقه بالتعامل والآداب
|
وتثبت على حكمه وصبر ولباقه
|
اهدافها تسمو على كل مرقاب
|
وتصعب مراقيها على كل عاقه
|
تعرف بماقف للرجاجيل غصاب
|
اما بجاه او حاجةٍ وقت فاقه
|
من ضمها بين المحاجر والاهداب
|
عزالله انه صان حق الرفاقه
|
يبين وقت الضيق فكاك الانشاب
|
عن واجبه ما ينثني عظم ساقه
|
طبع الصديق الحي ماهوب يرتاب
|
الطيب مع ربعه يعشقه عشاقه
|
ما عن مجال الطيب صده ومجناب
|
والا الردى حنضل ومرٍ مذاقه
|
وإلى حصل ضيقه وشرهات وعتاب
|
ما حلها كثر الجدل والحماقه
|
تجارب الدنيا بلا عد واحساب
|
ومن غرته دنياه تمسك خناقه
|
واللي يخون الشرب والزاد كذاب
|
حتى لو انه يدعي بالصداقه
|
البيت ما ياقف بلا عمد واطناب
|
ولا ينستر من دون حبكة ارواقه
|
أحمد بن سعود الحمد الزلفي |
|
