الدين ساس الحكم والعدل ميزانه |
والحكم لله وحده ثم اخو نوره |
صقر الجزيرة وسيف العز وسنانه |
عبد العزيز اللي محدن يشبه حضوره |
ياجعل حظه عفو ربه ورضوانه |
وعسى فعايله في دنياه مشكوره |
عسى الولي يسكنه في روضة جنانه |
ويلقى بها فاله ويلقى بها حبوره |
ومن عقبه اللي تبعوا نهجه وإحسانه |
عياله اهل الوفا اللي شورهم شوره |
هم مقطع الحق واهل الحق واعوانه |
وهم حريب العدو اللي نوى شروره |
اهل الوفا في زمان ثقلت امتانه |
واهل السخا في مكان كثرت طيوره |
الكل منهم يصدق فعله لسانه |
والكل في واجبه قام وخذا دوره |
ويكفي الفخر شيخه الوافي وربانه |
صمام أمان الوطن ومعلي سوره |
نايف عطية وطنا.. قرة اعيانه |
روح الوطن والوطن نوره وهو نوره |
وزير أمن البلد ومجوّد عنانه |
والدار من حنكته بالخير مذكوره |
مبروك للنايف الصمصام واخوانه |
مبروك من قلب هالشعب ومن شعوره |
بفرح وبفرح وبستانس على شانه |
وكل الوطن يفرح.. ترابه وجمهوره |
تستاهل المنصب اللي صرت عنوانه |
وتستاهل الطيب يا عده ويا بحوره |
ومبروك للمنصب اللي بك علا شانه |
ومبروك للمجد يومك صرت له صوره |
الله يعز الوطن ويعلي اركانه |
والله يرحم عقيد العز اخو نوره |
محمد بن راشد بن محمد آل حبشان |
|