في رثا الفقيد الغالي الشاعر خليف بن دواس المطيري -رحمه الله- وأسكنه فسيح جناته
|
فقدت رجل من الرجال الموالين |
وأمسيت متكدر ونفسي حزينة |
فقدت فارس شعر رد الميادين |
راعي المواقف والبيوت الثمينه |
في الملعبه يدين ويسدد الدين |
يحاسب الشاعر بوقته وحينه |
خليف بن دواس قلنا على الزين |
آخر شهر وآخر سنه من سنينه |
يا عين لا تبكين يا عين يا عين |
هذا قدر ربي وعندي يقينه |
خليف مات ومات غيره ملايين |
وحنا بعد لا بدنا لاحقينه |
هذا طريق فيه الأجيال ماشين |
ما فيه درب يسار وإلا يمينه |
والله ما نبغاه لكن دارين |
إنه مواجهنا بزينه وشينه |
لكن باللي يكتب الله راضين |
في كل حاله دبرة الله حسينه |
الموت أخذ كل الرسل والسلاطين |
ونبينا اللي ساكن بالمدينة |
يا ناس كونوا للقدر مستعدين |
كلّ على اللي قدمه الله يعينه |
الله خلقنا للعبادة وللدين |
الخلق خلق الله والدين دينه |
الموت حق.. ورابحين المصلين |
وكذلك اللي مرضي والدينه |
سعود بن عالي الجش |
|
