بين (أمجد وأيمن) دمعتين وجراح |
والهموم الخوالي! كم تشق الصدور |
الزمن وجه ذيب.. سطوته بالبراح |
فالليال البهيمة لانطفا كل نور |
في ضحى الكون تلقى من رمى له سناح |
حط دونه ودون الناس رايه وسور |
وانت زرع زرعته عقب جهد وكفاح |
ما جنيت محصوله مات عقب البذور |
قرنس الطير.. لكن صف ريشه وطاح |
وقبله الحر الاشقر من رثاه معذور |
العزا لك يا (بو امجد) والمراجل سلاح |
لا اصطفق جال بقعا ثم صار مخطور |
العوض عند رب ما يمد الشحاح |
الله اللي كريم.. كم يجازي صبور |
وانت صابر وصبرك فوق صدرك وشاح |
العرب خابرينك.. كم تشار وتشور |
والمصايب جليله ركبها ماستراح |
يطوي الناس طي لين لحد القبور |
والمراثي عباير يالقلوب الصحاح! |
والقصايد.. عنابرها مكاسر بخور |
من ثرى نجد يا (جلاجل) زعجنا الفلاح |
يا (عمر) دوك جرحي صار معك مخشور |
بين (أمجد وأيمن) دمعتين وجراح |
والهموم الخوالي! كم تشق الصدور |
عبدالرحمن بن محمد الفاضل |
|
