قصيدة في رثاء المغفور له بإذن الله..
|
ابن العم - صالح بن فلاح بن فهيد البليطيح.. رحمه الله وأسكنه فسيح جناته
|
يالله عسى في جنة الخلد مثواه |
النادر اللي طيّباتٍ فعوله |
الصالح اللي مصلح الله نواياه |
من طيب نياته.. عداه شهدوا له |
بشوش وأبهج من سجاياه.. لقياه |
يعجبك في طيبه.. وفعله.. وقوله |
ما ألوم عينٍ ما غفت عقب فرقاه |
وما ألوم كل اللي بكوه.. وبكوا له |
لأنه قليل اللي مع الناس حلياه |
له بالقلوب البيض.. صوله وجوله |
يهزنا يارب موته.. وننعاه |
ونقول: (دورات الليالي عجوله) |
كم واحدٍ قبل أمس معنا.. فقدناه |
راح.. وبقى بقلوب ناسٍ وفوا له |
يارب.. ما نجزع على شي تبغاه |
لكن حزنٍ بالضماير نقوله |
يفداك عمرٍ لجل عفوك قضيناه |
ويفداك كل الكون.. عرضه وطوله |
حنا عبيدك والعمر ما ملكناه |
وعمرٍ بليا طاعتك.. ويش هو له |
حنا تحت حكمك.. ورحمتك.. يالله |
يالله عسى عفوك علينا شموله |
ويالله عسى (صالح) بجنتك سكناه |
ورحمتك يا ربي عساها تنوله |
نرجيك.. ونلح بسؤالٍ طلبناه |
يا خير من كل الخلايق لجوا له |
عبدالعزيز إبراهيم البليطيح الدهمشي |
|
