يا ما أكثر ويا ما أكثر دواوينه |
شي قريناه وشي له تسمعنا |
الشعر ياهله جماله في مضامينه |
إذا اكتمل بالوزن والقاف والمعنى |
والزين يبقى ويبقى الزين من زينه |
ولا الردي ما شرينا به ولا بعنا |
من يجهل الشعر ويجهل في قوانينه |
لا يدعي الشعر ويستشعر ويجزعنا |
اللي عسر بيت في نطقه وتلحينه |
لو هو تمتع بشيله ما تمتعنا |
واللي لوا المفرده والقافيه لينه |
من كل ما هو غريب حط واشبعنا |
ما تلحقه في الشعر شرهه على شينه |
تلحق على مرجع اهل الشعر ومرجعنا |
السوق مفتوح ومفتوحه دكاكينه |
والأمن حاضر يشوف بضاعته معنا |
ياهل الشعر واجب حفظه وتحصينه |
من كل مستشعر بعثه يطالعنا |
جنيدل محمد عبدالله بن جنيدل |
|
