عبدالعزيز اخذ القلم وسجله

واكتب مشاعر خالكم يابن سلطان

ابن الخطيب اللي رضاكم رضا له

ويلا زعلتوا صار بالطبع زعلان

أحزانكم حزنه وعوق يتله

وافراحكم له فرحة باي ما كان

القول لا تترك دقاقه وجله

فيض الضمير اللي من الحزن مليان

اكتب تعازينا بصفحة مجله

لبوك واخوانك ومن حزنهم بان

اهل لنا جاهم من الحزن بله

الكل منهم بالحدث صار مرضان

ومن قال لك وين أم الاشبال قل له

أمانة ردت وللدين ديان

على الجميع الصبر والحكم لله

اللي بعلمه خالق كل الاكوان

الموت ما عرف المداوي دوا له

ولا فاد في الموت اختراع المريكان

لو كان من تغلي تسلسل وسله

تقول ما مور على قبض الاعيان

ولا بد كل هابط بالمظله

اما هبط في الصبح والا مسيان

لا شك يوم الوضع جا فيه خله

الواجب نشارك مع كل مشتان

يحق دمع العين غزر تهله

على فراق اللي لها عندنا شان

نجلا لها في القلب صرح تحله

قصر حصين ومحكمينه ببيبان

عفيفة في ضف شيخ نجله

وام لها قد سكنتها بالاعيان

حضي بها قرم كما السيف سله

رجل الحسب عالي النسب خصم الاقران

تلقى الشبب والمرجله في محله

لا جيت له من نازح الدار صلفان

ايلا سعى في مشكل هان حله

بالراي والا بذل ماله بالايمان

من حسن خلقه مجلسه ما تمله

الله يجازي راع الاحسان باحسان

محمد السلطان صافي لخله

وصفت له أم الخير في كل ميدان

شربوا من الصافي وثنوا بعله

مع العوافي يا فتى كلش زان

وقت الرخا يمضي كما شرب دله

ولا تم شي الا بدا فيه نقصان

وتبدلت برد الليالي بمله

وقت القسا يا طول يومه بالازمان

هبت رياح فراقهم مستقله

وما قدر الباري بلوح القضا كان

ولا هوب يدني الموت ضعف وعله

من وقف يومه لف من بين الاكفان

اختارها الرحمن في حوزة له

من عقب تطهير الفعايل والابدان

عسا لها في جنة الخلد فله

قصر على نهر حواليه بستان

الصابره واللي صبر ذا جزا له

يعطيه رب البيت عفو وغفران

المكثره بر البعل والمقله

من لومها القاصي وداني وجيران

لعل قبر ضمها جانب له

يعطره ربي بمسك وريحان

عليه سحب المغفره مستهله

من واصف نفسه رحيم ورحمان

يا رب ندعي بانكسار وذله

عسى لنا بدعاك فوز ورضوان

عبدك طلبك العفو عن كل زله

ما هيب زلات القدم زلة لسان

واحسن عزا من كان قلبه يغله

فرقا محبينه وخل وخلان

وان وقف باكر كل عود بظله

يا الله حسن الخاتمه وانت منان

وصلوا على اللي ملته خير مله

نبينا ما غاب نجم وما بان

صفحة الجزيرة الرئيسية

الصفحة الرئيسية

رأي الجزيرة