يا عاشقين المرجله والشكاله |
المرجله ما هيب وصف وتمثيل |
ترا المراجل ما تجي بالسهاله |
ادروبها فيها العنا والتهاويل |
تبغى طموح ما يوني نضاله |
حلحيل ما تغبي عليه المحابيل |
المرجله صبر الفتى واحتماله |
لا جات منها في النظر والدعاويل |
والمرجله كد ومد وقاله |
وتخسر اللي يجمعون المحاصيل |
والمرجله حمل ثقيل مشاله |
تبغى معيد ينهض الحمل ويشيل |
لو كان من جا كايد الحمل شاله |
ما كان في ذا الناس فرق وتنافيل |
خطو الولد بدر ترقب هلاله |
وعلمك بنور البدر يا ساري الليل |
البدر يسفر في الظلام اشتعاله |
وفي نور هديه يهتدون الدواليل |
وخطو الولد ديم حقوق خياله |
ومع نوض برقه يكثرون المحاويل |
وخطو الولد يعجبك نظرة خياله |
اجمل من الخفرات واقوى من الفيل |
مغفل ما داهم الهم باله |
عزي لمن هو نجدته لا وني الحيل |
|
