بنت ماحطيت لصدوغي وساده |
واتوخر كل ما أنكف الضلالي |
ولا خذيت النوم في المشراق عاده |
أطرد العيشه وأبي مكسب حلالي |
فوق أخو فلفي وأكمل له عتاده |
محتسن فيه الأواني والدلالي |
في مشاهي نجد وأمشي في براده |
وكل ما هب الهوى ينساح بالي |
والفتى وأن كان ما يغلي بلاده |
ما يجي في ديرة الأجواد غالي |
حالفٍ ما أرضى لنفسي بالزهاده |
دام ما حطيت في قبرٍ هالي |
ولا طلبت مساعدة صاحب سعاده |
ولا طلبت معاونة صاحب معالي |
أطلب اللي رحمته تشمل عباده |
كافل الأرزاق يعلم ما بحالي |
الله اللي يرزق عيال الجراده |
لا تركتهم فالخلا من غير والي |
محمد السليمان المحسن (الدرم) |
|
