خطاك السو يا نبع المكارم سيدي سلطان |
وقرت بك عيون المملكة والخير سلطانه |
لك الله يا يمين الخير والله مجلي الأحزان |
بدونك عيدنا غايب وكل الشعب حزنانه |
تجمع كل خلق الله وصاروا في جسد إنسان |
دعا رب البشر يحمي فنار الطيب وإنسانه |
دعا رب البشر يحمي سمو الطيب والإحسان |
قسم ما به بشر يحصي كرم سلطان وإحسانه |
دعا رب البشر ينجيه من يتملك الوجدان |
ومن هو يشبهه سلطان كل الشعب وجدانه |
دعا والله حققها وسلمكم علي الشان |
وجيتوا والفرح عيد ونشكر معتلي شانه |
لفيت قلوبنا شوق ومحبة ريقها ريحان |
وعطرت المشاعر واختلط فله وريحانه |
ملكت قلوبنا وأصبحت يا فيض الغلى عنوان |
ولي للعهد وافي دروب العز عنوانه |
تملكت الغلى فطره وفي شوفك سمانا زان |
رياض المملكة زانت وشوفك جونا زانه |
لفى بقدومك الخير وتغنت باسمك الريضان |
هلا بك والفرح نسنس ورفرف بين ريضانه |
هلا بك سيدي والقلب لهفه يرتجف فرحان |
وكل المملكة مثلي يمين الله فرحانه |
هلا عد الهبوب اللي تراقص داخل الوديان |
هلا بك عد ما سالت شعاب وفاض وديانه |
هلا بك سيدي والعيد عيد هايم وشفقان |
عليك المملكة يالعيد ولهانة وشفقانه |
هلا يا سيد الطيبة هلا يا نشوة الأشجان |
خطاك السو رددها خفوق هاضت أشجانه |
|