أقبل الليل الطويل وبدا هم جديد |
يالله إنك ترحم الحال وأنت أدرى بها |
المصايب تضرب القلب بايدٍ من حديد |
لين وسّم في فواد الشقا مضرابها |
والمصايب حالها كل ما تنقص تزيد |
ما عرفنا حلها لو نعرف اسبابها |
والامور الكايدة قيدتني بالف قيد |
مير يالله الفرج لو تقفل بابها |
ثقل حمل شعيل يوم العرب تبغى الشديد |
والعرب لا قصّر الرجل شاف عتابها |
ضاقت الدنيا عسى عقب ذاك الهم عيد |
سنّة الدنيا ولازم لنا نشقى بها |
والأمل موجود والدم يجري في الوريد |
لو تجي من ضرس الايام والا نابها |
وإلا انا يا وجد حالي على الظبي الفريد |
ماخذٍ روحي وانا راضي ولا جابها |
مقفيٍ بالروح عني وهو راسه عنيد |
والحقوق تضيع لامن سلا طلابها |
يدري إني راضيٍ بالشقا دامه سعيد |
واثقٍ والشك نفسي فلا ينتابها |
بالنهاية بنشده وأطلب العلم الأكيد |
منه يوم الناس تدّي حقوق أصحابها |
بسألك بالله قل لي وش انته مستفيد |
بس ابي منك الاجابة وانا برضى بها |
أحمد الصميت |
|
