وش حيلة اللي بذّه الحذف وادماه |
من جاهل مندّس في درق غاليه؟! |
ان جا بيصبر غثه الخبل وآذاه |
وان جا بيحذف وقعّت في مواليه!! |
والناس تجهل ما جرى له وما جاه |
تزيد همه بالعتب والمشاريه |
لا واعذبه من حياة المعاناة |
ما كنه الا قابض الجمر بيديه |
مجبور يصبر وان تعب ما يقول: آه |
حتى تمادى بالجهالة عواديه |
والنذل ما تنفع معاه المداراة |
يزيد شره مع خطاه تماديه |
هذا بعض هم الشقاوي وبلواه |
ما جاه من لوعات الأيام يكفيه |
لكن على الله - عالم الغيب - شكواه |
سبحانه اللي من هل الكيد ينجيه |
عايض بن مساعد |
|
