يا سحاب الهجوس اللي على القلب وبله
|
في معاليق قلبي سيلي كل وادي
|
كل رجمٍ طويلٍ خلي الماء يبله
|
ثم عودي على حد السهل والحمادي
|
أصغر الهم أكبه وأكبر الهم أفله
|
وأدفن الجمره اللي تحت كوم الرمادي
|
آه وا عيني اللي كارها ما تمله
|
مثل هداج تيماء ما عليها مزادي
|
كل ما قلت ياعيني بالله بالله
|
كفي الدمع ما ينفعك كثر العنادي
|
اسفهتني وجابت دمعها الليل كله
|
وأرغمتني على كثر البكا والسهادي
|
وفاح صدري بهرجه فوح هيلٍ دله
|
كبها من صنعها فوق جمرٍ وقادي
|
وانشوى قلبي المسكين في وسط مله
|
ولعت به يالينه صار قطعة سوادي
|
أنعي الطيب لأهل الطيب واللي يصله
|
مال سود الليالي غير بيض الأيادي
|
وياهل الطيب والموضوع دقه وجله
|
إستوت كامل الوجهات داخل فؤادي
|
بعد أبوي الذي كنا نجي تحت ظله
|
عن هجير السموم وعن هبوب البرادي
|
أبيض الوجه فيه الطيب خصلة إجبله
|
شوفة الضيف عنده مثل صبح العيادي
|
مال عينن تعرفه غير تبكي وفاً له
|
ومال قلبٍ يعرفه غير يعلن حدادي
|
وكل رجلٍ يعرفه مجلسه ما يمله
|
مديٍ فرض ربه لازهمه المنادي
|
كل راعي علومٍ عند ابو عبيد يدله
|
ليت الأعمار بين الناس مهدا وهادي
|
نص عمري فداه ونص رضىً له
|
ونؤمن بما قضا ربٍ يعين العبادي
|
ويا مسا الخير لاهبت نسانيس قله
|
أتطيب بذكره بين مسكٍ وكادي
|
ويافضا الأرض بعده من يسد بمحله
|
جاوبي يا سهول وجاوبي يا بوادي
|
فيحان معجل المطيري |
|
