البارحة ما غمض الجفن يا حمود |
عيني محاربة لذيذ الرقادي |
كني سجين دونه الباب مردود |
محدٍ سمع صوته لونه ينادي |
ودي بشوفة نجد وهضابه السود |
وتمشي في نجد غاية مرادي |
أهل الكرم والطيب والعز والجود |
نعم الرجال ونعم هاك البلادي |
صبرت أنا والصبر له قدر وحدود |
وحاولت أخف الهم والهم زادي |
يا لله يا معبود يا خير معبود |
يا فارج الضيقات رب العبادي |
تفرج لحالٍ ناحلة كنها العود |
معاد ينفعني شرابي وزادي |
حب الوطن يا ناس ما فيه منقود |
الله خلق حب الوطن في فؤادي |
أحبها يومنها منقع الجود |
مصيونةٍ ما دنسوها الأعادي |
يقام فيها الشرع وتطبق حدود |
دستورها القرآن هو خير هادي |
تنعم بأمان وخير في ظل آل سعود |
نسل الشيوخ معطرين الهنادي |
وأزكى صلاتي عد ما هبت النود |
على الرسول اللي دعاء للرشادي |
الشاعر سهل بندر المقاطي |
|
