لا ياعلي ماهمني مستواها |
ولانيب من يعشق سراب المشاهير |
صحيح يسرح خاطري في حلاها |
اللّي غلب سحرٍ حكته الأساطير |
وصحيح أنا طيرٍ مداري سماها |
وأصل.. السما في ملبسه يغري الطير |
وصحيح أنا شاعر خذاني هواها |
ومن طابع الشاعر يحب الغنادير |
وصحيح أنا طفلٍ حواني دفاها |
والطفل يحفظ للدفا.. كل تقدير |
وصحيح أنا دربي يغازل خطاها |
ومن لوعة الغربة عشقت المشاوير |
كله صحيح إلاّ إني أركض وراها |
لو هي قدر.. وأنا رهين المقادير |
تدري.. ويمدي «صامل» العلم جاها |
إني عنيد مخالفٍ وجهة السير |
والله.. فلا أخضع لو ملكني غلاها |
وإن طوعتني: ما بقا بالبشر خير |
سليمان المانع |
|
