وجيت أقول..

إني هزمني البرد

وإن الوجد كايد

والأمل خوّان!

وجيت أقدم لك قصايد ورد..

لكن.. نصفها حزنه يفوح

ونصفها ذبلان!!..

وجيت أبا أنسى

وصدقيني ما بقى فيني جلد

ومحدٍ من الهم خالي

وكل خالي..

ما خلا من هالنكد

ضحكتك، ياني شغوف لجلجلتها

جلجليها.. واتركي الدنيا تجلجل

واعزمي الفرحة

إشرقي من وحشة العتمة وكوني

صبح يرتاح بعيوني

وشمس ريانة حنان

علميني أبجديات الهروب من الغروب

ولحظة الفقدان!..

آه.. يا صعب هذا الزمان

وين أوليّ؟!

ما بقي لي غير وجهك..

جيت ألوذ بنور وجهك

من عبوس أهل الزمان!

جيت أقول

إني تعبت من السفر

بين الصور..

وإني ضجرت من الضجر

ومعانق الجدران!!

وخليها تعجل بالوصول

الأغاني..

كذبة إنسانٍ يعاني

وشي ثاني

لا تظنيها مواني

ولا تعديها ولا ربع الحلول!

يا دليل اللي غدا منه الدليل..

اقهري هالمستحيل

وانفضي عن كاهلي حمل المسافة

ولا تخليني كذا.. مثل الذليل!!

وكان في قلبك حنان

طالبك لا تتركيني

في مهب الحزن وأوجاع الزمان

اغسليني من غثا الأيام بشوية وفا

ودوري لي في ظروفك عن مكان وعن أمان.