ماهو صحيح الصبر مفتاح الفرج |
ياما صبرنا بس ماشفنا حلول |
يصعب علينا الصبر قدام انهرج |
ويسهل علينا الصبر لاجينا نقول |
نبي نذكرك السلوم وننحرج |
وليا سكتنا خايف الدعوى تطول |
امتونا لاصحابنا صارت درج |
وكل (ن) يبا ايدور على القمة نزول |
يا صاحبي لاهنت بالله اندرج |
مقدار ما يأخذ من الورد الذبول |
أنته من اللي صار ما عندك حرج |
وأنا من اللي صار صايبني ذهول |
والصاحب اللي في مواقيفه يرج |
ومن الوفا وجهه قضيف ومغسول! |
هذاك من قلبي قبل مدة خرج |
أسرع من الكلمة من لسان العجول |
شفته على درب الوفاء قام يعرج |
واصبح عجاج البعد من دونه يحول |
مفروض يرفع عن عمى القلب الحرج |
حتى يصير العذر من ضمن الحلول |
عقاب العماني |
|
