الشاعر المعروف فهد المنيخر، يتحدث - بعمق تجربة - عن الحياة ومواقفها وطبيعة ما جبل عليه البعض في تعامله مع الآخرين وبصراحته المعهودة يضع النقاط فوق الحروف:-
|
يالله ياللي.. فارضٍ.. دين الإسلام |
على طريق الطيب دربي.. تدومه |
ما دام طير الموت لي.. ما بعد حام |
وأرخى جناحينه.. وجتني سهومه |
العمر قصه تنتهي مثل الأفلام |
طلاّبها.. لا بد.. ياخذ لزومه |
به يوم ما يفرق.. عن أشكال الايام |
ولا يوضّح.. للبنادم.. علومه |
يمشي وميعاده.. مع الناس.. قدام |
والحاكم الله والحياه.. أمحكومه |
يا قلبي إرضخ.. والرضا.. سيد الأحكام |
سماك لا تغويك لمعة نجومه |
عرضّتني.. شوحات.. بقعا بدرهام |
ما فيه ضلع إلاّ تشرّف.. رجومه |
أرتح.. ولا تقزي.. خويك ليا نام |
ولا تصير المتهم.. في همومه |
لا عاد.. تصبح بين مسرى.. ومجهام |
اللي تعذّر.. غايتك لا تلومه |
الناس.. يا قلب الخطا صاروا.. أقسام |
والوقت.. يدرج.. ما تغير يمومه |
خل الليال.. الماضية.. تلحق العام |
ما فات مات.. ويصعب انك تسومه |
حنا تغيرنا.. والايام.. الايام |
شهر يمر.. وذاك.. يعلن قدومه |
اللي منوّل.. كان بالضيقه حزام |
جمل محامل.. ما تلاشى.. عزومه |
يدري به.. الداني.. والاقصى ليا قام |
ونفسه عن الفعل الهزيل.. أمحشومه |
لا شانت.. وجيه الرجاجيل.. مقدام |
وله المديح بغيبته مع خصومه |
اليوم.. ما له.. مع هل النعم مرسام |
بعد الزمان.. اقفى وضاعت.. سلومه |
لكن ولو دارت.. دواليب.. الايام |
الحر الاشقر غير والبوم بومه |
الشاعر فهد بن ناصر المنيخر |
|
