الحب ماله يابن الاجواد تقدير |
عند الهنوف اللي تزايد دلعها |
لمحت ابيها تسلك الدرب وتسير |
لكن تغليها دمر مانفعها |
طرد الهوى يتعب قلوب الغنادير |
حتى الرجال قلوبهم ينتزعها |
يابنت والله ماحسبت المخاسير |
ضحيت لكن هامتي ماخضعها |
بعثت لك عن صادق الحب تقرير |
يحمل مشاعر صادقه ماخترعها |
هجرت لعيونك حلا النوم والغير |
واعطيت لك روحي وقلبي تبعها |
كنت احسبك ورده تسوق التباشير |
تتبع شروق الشمس وتميل معها |
لكن طلعتي شجرة مابها خير |
عز الله انه ماكسب من زرعها |
هذا حصيل الي تعب دون تفكير |
رهن حياته عند سبة وجعها |
الحزن يدفع دمعة الشوق وتحير |
حزني دفعها وعز نفسي منعها |
رحال ماتعب لو تطول المشاوير |
لو زاد حملي قامتي ماهلعها |
يلومني شخصٍ ورد جمة البير |
ماجف ريقه والمراره جرعها |
مايدري ان هجوس قلبي طوابير |
هواجسٍ تزري خفوقٍ جمعها |
معجب عبدالله السليمي |
|
