قال أنت بك مسحة حزن قلت غلطان
|
أصلا أنا كلي من الحزن مخلوق
|
وجهي مدينة دمع والحزن سلطان
|
والضحك مبطي من محياي مسروق
|
مثل السجين أمسي والأحزان حيطان
|
عطشان للفرحة ولا حولي بروق
|
رحال أدور موطني بين الأوطان
|
زهابي الأحزان والدمع والشوق
|
واللي عطيته أثمن العمر سفطان
|
أقفا وأنا في حبل الآمال مشنوق
|
من يوم أخذ غالي سنيني ولا أعطان
|
كذبت جملة كل مطرود ملحوق
|
مركب حياتي مبحرٍ دون قبطان
|
الموج من تحته والأرياح من فوق
|
ما لاح في عيني من البعد شطان
|
شمس الفرح ما عندها نية شروق
|
متشكلٍ مع جرح حزني وورطان
|
تنقصني الخبرة وينقصني الذوق
|
بذتني أحزاني وأنا واسع أبطان
|
من ونة الخافق إلى دمعة الموق
|
أعوذ بالرحمن من كل شيطان
|
وأسأله الرحمة اليا التفت السوق
|
سليمان راشد الغفيلي – بريدة |
|
