الأصل من روس المناعير ينجاب

والصدق يثبت والدوادي ذهيبه

والشمس ما يخفي سنا نوره حجاب

والسيل يجري مع مجاري شعيبه

والنفس والشيطان يوردن الأتعاب

وطبع البشر خطاء ولو ما درى به

وفي قصيدة يعبر فيها عن حال هذه الدنيا ومنها يقول:

دنيا دنيّه لو صفت لك عطتك إمهال

هيهات تبقى صافياتٍ مناهلها

دنياك يا صاحي مالك بها منزال

غيرك نزل ثم داعي الموت رحلها

مشيه على روس الأوادم غدا زرفال

هي عادته ولا أظن تقدر تبطلها

العمر ثوبٍ تلبسه زاهيٍ مختال

وصيور ما جدّ الملابس تسمّلها

لو لقى الضامي هوان الدهر سيل الشعيب

ما شرب صاف الكدر ولا هودت محايله

لا طمٍ وجه العنا بالصبر والياس عيب

والليالي بالمقادير ما هي بحايله

والفرج يشرق بشاره مع الظرف الصعيب

ورحلة الشقا تبي تحط عن رحايله

دار اللوى والتوت برضه ترايبها

بالحزم الأسود وفيها عاويٍ ذيبه

بقعاء بقع به وخضّر في جوانبها

الوادي اللي عبرها وحار في جيبه

هي ديرتي بالصفا تكثر مصاعبها

يا من يذلل صفاةٍ في مصاعيبه

عاشوا بحد الصفا قالوا نجربها

الطير تقدح بصفيانه مخاليبه

شبابها تابعت بالسلم شايبها

الشايب اللي خبيرٍ في تجاريبه

واليوم هي لوحةٍ محدٍ يكذّبها

سبحان من صوره والناس تمشي به

رسّامها لو بغى رسمه يعذربها

من شافها صار في عقله يهذريبه

حلوةٍ صفاة بقعاء هي مقرّه

يا كبر غلاه عند أهل الصفاتي

تقري الضيفان والطرقي يمره

شجرةٍ فيها ومنها الخير ياتي

تمْرَها يا ناس من ذاقه يسره

والهدايا من نماها مثمناتي

أطلب من الله يا ملا يستر الحال

يضفي على كل المسلمين ستره

اللي لبس له بشت وشماغ وعقال

ويفصخ شماغه ويلبس احيان غتره

هذا هو اللي بهالزمن خوش رجال

وهذا هو اللي فوق والناس حدره

البشت والغتره هي الجاه والمال

والرجل ترفع لبست الخام قدره

صارت مظاهر وانت يا طيب الفال

غريب مذهب عايش الوقت سدره

مالك على مرقاب الأيام منزال

الطير صار اليوم رهين وكره

واللي يبي يكبر بتجميع الأموال

الله يقطع بين الأجناس بذره

اما المراجل والمواقف والأفعال

رجالهن يقصر ولو طال شبره

واليوم هذا اليوم يا سوء الأحوال

الله يعين اللي يبي يصير بكره

الشمس عيت تكشف دروب الأجيال

وصار العوض عن شوفة الشمس بدره

يقوله اللي صار له وقت ما قال

الصابر اللي نفذ الوقت صبره

بدر محمد الأسعدي – بقعاء

صفحة الجزيرة الرئيسية

الصفحة الرئيسية

رأي الجزيرة