يا موت كم فرقت شمل المواليف

وأخلفت هقوة واحدٍ ما به اخلاف

جرحك سطا بين الضلوع المهاديف

والحزن في وسط الحشا ماله أوصاف

حالي سقم ودموع عيني ذواريف

قمت أزعج العبرات زافٍ ورى زاف

أبكي على اللي ما بخل

بالمصاريف ولا قسّم المقدور لأرباع وأنصاف

أبكي على ضلع ٍ يذري عن الحيف

ويضفي على اللي يزبنه ستر ولحاف

أبكي على عمي فريد التواصيف

وأرثيه وحروفي من الهم تنلاف

أبوعبيه ارتحل بأول الصيف

مصيبةٍ عمّت والأيام زلاّف

جينا وهلينا دموع ٍمراديف

وجنازته قدامنا وسط الأسعاف

وعليه صلينا مع أهل المعاريف

ولمنزله شلناه من فوق الأكتاف

لا والله ألا مات راع المواقيف

النادر اللي ما ترك نهج الأسلاف

مات الشجيع اللي عليه التحاسيف

اللي نهار الضيق يعرف وينشاف

مات الذي ما لاذ عن واجب الضيف

يقوم به حسب العوايد والأعراف

مات الذي يرسي ليا شيف ماعيف

ويظهر بفعله لا احتمى كل ميقاف

تبكي على فقده رجالٍ عواريف

وراع الشرف لامات تبكيه الأشراف

وتبكي على فقده دلال ٍ مهاديف

ابهارها ينقاه من بدّ الاصناف

ويبكي عليه العز ومدوّر الكيف

وتبكي عليه عيون وقلوبٍ انظاف

يا الله ياعالم جميع التصاريف

يا الواحد اللي بالمخاليق روّاف

تغفر لبوزايد مغيث الملاهيف

وتجعل له الجنة ربيعٍ ومصياف

محمد أبوعبيه

صفحة الجزيرة الرئيسية

الصفحة الرئيسية

رأي الجزيرة