تفاصيل اللقاء الأول بقت في ذاكرة مغليك |
بقت كن الزمن حالف حبيبي ماينسيني |
بقت ذكراك عطره والسوالف كلها ماضيك |
اسولف بك على نفسي وافرك راحة ايديني |
اهوجس بك تناديني وافز من الوله ناصيك |
تسوقني على بيتك بدون شعور رجليني |
اجي لك وانتبه قدام بابك من قبل لا اجيك |
واعود واذكر اني كنت اهوجس بك تناديني |
تصدق من كثر ماصرت افكر بك واهوجس فيك |
خيالك وين مالقيت وجهي مايخليني |
حبيبي حط في بالك ترى مازلت انا شاريك |
ابيك انت الغلا والشوق والحب وعناويني |
حبيبي لا تحسب اني على طول الزمن ناسيك |
انا وشلون بنسى اللي سكن داخل شراييني |
اشوفك في نفس صدري وقلب بالغلا مطغيك |
واشوفك في وجيه اللي من العالم يحاكيني |
واشوفك وين مالقيت وجهي وابتسم وادعيك |
انادي لك بهمس وخوف لايفطن معاديني |
لك الله كل ماجابوا مجالك وذكروا طاريك |
أونّ من الوله ل اسمك واخاف الناس توحيني |
واقوم ارفع يديني واتحرى ظمتي ل ايديك |
وارد أيدي متحسر على فرقى محبيني |
نسيت انك بعيد الله يردك يابعد باغيك |
عسى عيني بنظرة عينك الحلوه تسليني |
تعال احتاج لك مغليك ياراحة نظر مغليك |
تعال تزين لحظات اللقاء في شوف غاليني |
تعال وكسر عناد الظروف وعاند معاديك |
تعال نعيد لحظات اللقاء الاول بعد حيني |
فهد البداح |
|
