والله فقدتك يايبه وين ألاقيك |
جيتك على نفس الوعد ما لقيتك |
كل المشاعر ياغناتي تناديك |
يسوقني شوقي على باب بيتك |
مافيه غير الشرشف اللي يغطيك |
ومخدتك والمشلح اللي هديتك |
هذا الفراش وذي بقايا المساويك |
ذي ساعتك.. هذا الدواء اللي عطيتك |
ماعاد للمسجد تبيني أوديك |
الظاهر اني تهت يوم احتريتك |
قفلت بابك يايبه والشبابيك |
فجر الاحد ناديت روحي وجيتك |
ارسم ملامح في عيوني تراعيك |
ينساني الله كان غبت ونسيتك |
تغيب صوره مير تبقى معانيك |
مهما كتبت أوصافها ماوفيتك |
لو شفت وش كثر المصلين يكفيك |
مالمتني يابوي لو مابكيتك |
أي والله افرح يايبه وافتخر فيك |
بين العرب يابوي مرفوع صيتك |
ارثيك.. لاوالله خطا مني ارثيك |
المعذره يابوي لو مارثيتك |
فرقاك ماهانت على قلب مغليك |
لو الفدا ينفع بروحي فديتك |
الله على طيب الفعايل يجازيك |
الشكر لله ماذكر اني عصيتك |
ترحل ويبقى حي ذكرك وطاريك |
لكن على نفس الوعد ما لقيتك |
ناصر القزلان |
|
