المعصية عينها تغري ومزيونة
|
كم لي وانا غارق ٍ فيها وعاشقها
|
دنياي انا ادري بها بالفعل ملعونة
|
بنتٍ تخون الصديق اللي مرافقها
|
ماعدت اخايل بروق الذنب ومزونه
|
لو خيلت بالجمال ولاح بارقها
|
اللذة اللي برمل الفسق مدفونة
|
في غير درب الهدى مانيب ذايقها
|
دموع عيني من العصيان مسجونة
|
يارب انا طالبك (ذلة لك) اعتقها
|
بغّض لنفسي طريقٍ فيه مفتونة
|
واجعل صغاير خطاياها تضايقها
|
لوامةٍ لو وقع ذنبي على هونه
|
في غير حبك طلبتك لا تعلقها
|
عبدك ضعيفٍ كسيرٍ وده عيونه
|
ينصب ماها ندامة لين يغرقها
|
ناصيك هايب ولا غيرك احد عونه
|
صفحات عمر ٍ مضى.. باليوم حارقها
|
ياغافر الذنب عبدك محسن ظنونه
|
دنياه من خاطره جا لك مطلقها
|
اغفر لنفس ٍ من التقصير مغبونة
|
انت الغفور الرحيم الرب خالقها
|
فيصل بن سبيّل الباهلي |
|
