الله من عينٍ قليل هناها

السهر طاولها على كل الاوقات

من علّةٍ ما اظن يوجد دواها

تحتار فيها أهل العقول البصيرات

تغطلست نجومها في سماها

وعلى محللها تطول المسافات

أزريت أميّز عدلها من خطاها

أدير فيها الرأي واقول هيهات

أسباب ناسٍ تيّه الله قداها

شانت ضغاينها وشوفاتها افوات

واهل النمايم تو نالت مناها

اهل القلوب اللي بها الحقد غاطات

اللي يسويها ويركض وراها

وان سمعوا الكلمة بنوا عشر كلمات

وش فايدتها خيّب الله سعاها

حصيلها زرع الفتن والحزازات

على طريق الرشد ما الله قداها

ما فازوا إلا بالعلوم الرديّات

وين الرجال اللي يذرّي ذراها

أهل التقى واهل النقى والامانات

اللي تكرم بالقسا من نصاها

وان جت سوالفهم الياهي زكيات

أهل النجور اللي تقانب عواها

ومجالسٍ ما تعرف أهل الشبوهات

وحدودهم محدٍ توهق حماها

كم طامعٍ صار طمعه بالمناجات

من قدّم الحسنى معاهم لقاها

واللي يبا يبطش يشوف الاهانات

حرِّم على العايل فلاها وماها

وان جا بدرب الطيب يلقى كرامات

وهذي هي الديرة وهذا بناها

ولا اقول غير الله يرحمكم اموات

وان كان سكّان البلد ما حماها

طمع بها من لا يعرف الطماعات

ونصيحةٍ ما نيب ادور جزاها

لعلها تلقى القلوب اللبات

ترا التسامح للنفوس وصفاها

وتجاهل الفايت ونبذ الخلافات

أخير واحسن من تمادي رداها

وخلّو عداكم تجرع السم بسكات

الخيمة اللي ما يذري ذراها

عنها مباتك بالعرا فيه صرفات

مير اجمع الحزمة وشدّوا رشاها

والبير دمّوها على كل ما فات

الله يعدلها ويصلح نياها

ويعيذنا من كل مبغض وشمّات

وصلو على مبعوث الاسلام طه

ما طاف بالكعبه وشاهد عرفات

ذيب بن متعب البراق

صفحة الجزيرة الرئيسية

الصفحة الرئيسية

رأي الجزيرة