ليه أتجمع داخلي وأسكن الصمت
|
لا رفت حروف الوضوح بكلامي
|
ما نام ليل الصبر فيني ولا نمت
|
إلا على صوت دفاه متنامي
|
لو السنين تقوم قبلي ليا قمت
|
ما طاح وسم وعشب الأحلام دامي
|
ما أفطرت من زاد الصداقة ولا صمت
|
ولا رحت رويان ولا جيت ظامي
|
لكن على غصن المشاربه سلمت
|
لين اعتذر كف الردى عن سلامي
|
بالطيب وعروق المراجل تحزمت
|
من فزعتي عطر البنادق حزامي
|
مثل النخيل أضحك شقا لو تألمت
|
ما قلت لرياح العبث وش علامي
|
رتبت فوضى موج الأيام ثم عمت
|
قبل البحر يجمع لملحه عظامي
|
لو من جهل سرد النوايا تعلمت
|
ما أمطر بياضي فوق بعض الأسامي
|
بس آه وش ذنب الندى لا تجهمت
|
إنه يهفهف وآخر الجرح حامي
|
|
