أنجال ليثٍ خلف أشبال وفهود

باسم الإله اللي على العرش معبود

اللي رفع سبع وسبع تحتنا

اللي سجد له بآخر الليل داؤد

ونزل كتاب من حروفه لغتنا

الله يجنبنا علم كل منقود

يا رب تجعل بالهدى خاتمتنا

هذا وابقطف مع هل الشعر عنقود

بأبيات أركزها حسب معرفتنا

مني هدية لأهل المجد والجود

للأسرة اللي حاكمه مملكتنا

أنجال ليث خلف أشبال وفهود

قيّادنا اللي وجهوا قافلتنا

اللي وفاهم له براهين وشهود

بجهودهم كل الدول صالحتنا

نصَّارة المسلم على كل نمرود

أفعالهم بالمجتمع شجعتنا

حكام يا صل وصلهم كل مظهود

هم درعنا الضافي وفيهم ثقتنا

وحنا لهم ذرعان وأكتاف وعضود

وافين لا من الدواعي دعتنا

معهم لنا وقفات بالهون والكود

شوايب الأفكار ما غيرتنا

شبابنا واللي بالأحضان ممهود

مع رأية التوحيد لاعمدتنا

والراية الخضراء لها العز موعود

باسم الجلالة صوتنا ولهجتنا

إسلام والإسلام له شرع وحدود

وأعدل حكومة بالعدال أحكمتنا

وأهل الوطن لقيادته شعب وجنود

وبالدين وأحكام الشريعة صلتنا

إسلام ما يدخل بنا شك وصدود

عشنا على الملة وفيها نبتنا

ملة رسول جاهد الشرك بجهود

اللي على هديه تسير أنظمتنا

إن كان به ناس لنا ضد وحسود

نار الحسود بخافقه ما أحرقتنا

حنا العرب وأهل الحسب ساس وجدود

بمقدمة مجد العرب مرحلتنا

ما نال منا ساعي الشر مقصود

ودعاية الأحقاد ما زعزعتنا