ظهر منَّا عظيمٍ أجبر التاريخ يشقى به

ظهر عبدالعزيز اللي فعوله صعب نكتبها

هنا التاريخ نفسه لو يحسّب ضيّع حسابه

وهو عنده عذر دامه لحاله صعب يحسبها

هنا سيفٍ على حق ومع الحق ومع أصحابه

هنا أمواجٍ تلاطم ما ربح من هو يقرّبها

ظهر منَّا عظيم أجبر التاريخ يشقى به

ظهر عبدالعزيز اللي فعوله صعب نكتبها

ظهر في نجد وأثري نجد كانت تشكي غيابه

معاشقته على وضح النقا ترجيه يخطبها

وكبر عبدالعزيز وحظنا يومه كبر جابه

نعرف إن نجد فتنه بس ما كلٍ يناسبها

وكبر هذا العظيم ونجد صارت أكبر أحبابه

واهو، طبعاً، يده أطهر يدٍ لمست ذوايبها

ومع إنه راح.. لكن نجد عجْزت تطوي كتابه

تعدّه ألف مره كل ما عدّت حبايبها

تقول أمجادكم لليوم هذا هي من أسبابه

ترى مهما وصلتوا حسبةٍ بالضبط حاسبها

وقالت جعل ربي يرحمه ويطهّر ترابه

عسف شبه الجزيره في يديه وصار صاحبها

مع إن شبه الجزيره كانت أشبه حيل بالغابه

ولكنّه عرف زيزومها وشلون يكسبها

حكمها في كلام الله وشرع الله وبكتابه

ونفسٍ ما يهذبها الكلام السيف هذّبها