ضاق صدري.. وانت.. قاطعني شهر

والصبر.. لو طال قلّي ويش جاب

الله أكبر.. ويش باقي ما ظهر

دام في ظهر الوفا.. مغروس ناب

سقت لك عمري.. على كفي.. مهر

ودست.. من شانك.. على روس الصعاب

ولا كسبت.. إلا دموعي.. والسهر

ولا شكيت.. إلا تباريح العذاب

ولا زرعت.. إلا من اشواقي.. زهر

ولا جنيت.. إلا مشاريه العتاب

الجفا.. في حق من حبك.. دهر

والوفا.. في حق من حبك.. سحاب

كف جورك من طعوني ما طهر

وصدك المعتاد.. لازم يستتاب

الشتا.. لا غبت.. شدّبي.. الظهر

واستلذ.. عيون.. شوقي لك.. وذاب

واستباح.. ضلوع صدري.. وانصهر

وانفتح له.. في ضلوع الصدر باب

يوم شفته.. في ضلوعك.. مزدهر

لا يغيب.. ولا يموت.. ولا يهاب

جف شوقك.. يوم شوقي لك.. نهر

واستوى.. عندك.. حضوري والغياب

وكان.. ودك تعرف.. اشمعنى القهر

القهر: لا صرت تطرد لك سراب