سماع الإبداع يا محلا نجومه
بليل ينطوي في بطن يومه
يمر وينتحي والليل ساري
ويسرقني على غفلة ورومه
وشمر ساعدي وشد حيلي
وحيل الموهبة هذا لزومه
يوردني وتجبرني طموحي
ازور الشعر في بحره وعومه
وابيع الروح من شان الجواهر
وقوم الهيبته مليون قومه
واصافح كل فكر ينمي له
بفكره وتقدم في قدومه
حلات الشعر في وقته وحله
إلى صارت على اليمه يمومه
يطيب الخاطري عطر المسامع
إلى كل ارجح ورد علومه
يجي للعلم والاشعار داعي
ونفسي مع هل العرف امعزومه
اساهم بالتماثيل الجديده
وحل بشعري حبال الخصومه
وانادي للتكاتف والتعاون
واحب الخير وادعي للحكومه
بدعوة صادقه من قلب مخلص
على وضح النقا بيض سلومه
على مبدا حكيم الراي ابصدع
بكلمه والزمن واجد سهومه
على المسؤول حفظان الأمانة
وكبح الغش والنفس الظلومه
وعلى التجار نطرات التوزن
ورع العزم لا يثني عزومه
ترى باب الجشع لازم نسده
عسى يرد الزمن يغلب سمومه
يا نفس تدحر أهل الشر دايم
احليها على قب فحومه
بيوت العز عز المن دخلها
وبيوت الذل بالذل امهدومه
عن الاسهاب أبخم الرساله
بعطر العرف والطيب امختومه
صنعت لنفسي الفرحه صناعه
ولو قلبي تنازعني همومه
ابي نظرة صديقي بالعلالي
ونظرات المعادين امعدومه
صالح عبدالرحمن الصالح الناصر - الزلفي
