أصحابنا يابو فهد ماهم اصحاب
تغيروا يابو فهد دون سبه
وتبدلت احوالهم والغلا غاب
وهبة رياح من الجفا في مهبه
هذا الزمن يابو فهد مابه احباب
الا قليلٍ بالعطاء والمحبه
أحباب صدقٍ دون لعبه وكذاب
ولادورو بالكذب في كل شبه
ناس لهم بالقلب واحات وهضاب
ياكل حنين القلب حبه بحبه
كلامهم واحساسهم بالحلا ذاب
ناسٍ على الفزعات هذا مطبه
تغنيك اي والله عن بعض الاقراب
وللحب معنى بالحنايا مصبه
في قربهم جنات وردٍ وعناب
طعم العسل مابين قشره ولبه
والا الزمن محكوم في بعض الاتعاب
واوضاعنا في هالزمن مستتبه
وانا انا مع صاحبي دون الاجناب
أدمح خطاه وبالخفا ماأسبه
ان جيت له بود صادق وترحاب
ولجرحه الماضي حياته وطبه
أرضيه انا بالنفس من دون الاغراب
واتحمله من جّد مااقدر اكبه
يعني أنا ماانساه من دون أسباب
وابادله في حب قلبٍ يحبه
لأنه نهاية هالعمر حفنة تراب
وقبرٍ يضمك وكل شي تنبه
خلك على وضح النقا دوم بحساب
وحاسب ضميرك بالحقيقه وربه
والصبر يفتح لك مع الوقت أبواب
وتعيش في دنياك من دون غبه
اي والله اني للغلا دوم طلاب
ومن باعني فالله ربي وربه
أصحابنا ياللأسف ماهم اصحاب
تغيرو ياللأسف دون سبه
فهيد البقعاوي
